ខេត្ត ឧត្តរមានជ័យៈប្រភពពីមន្ត្រីនៅ ច្រកទ្វារអន្តរជាតិអូរស្មាច់ បានឲ្យដឹងថា បច្ចុប្បន្នឈ្មួញធំៗ មួយចំនួនបន្តនាំចូលទំនិញ គេចពន្ធ ទំនិញបង់ពន្ធមិនគ្រប់ និង ទំនិញខុសច្បាប់យ៉ាងពេញ បន្ទុកដោយសា រមានការឃុប ឃិតបើកដៃពីសំណាក់ លោក ឈុន សុភមង្គល ប្រធានគយ ខេត្ត ឧត្តរមានជ័យតែម្តង។តាមប្រភព ដែលស្និទនឹងលោក សុភ មង្គល មេគយខេត្ត បានឲ្យដឹងថា ការដែលឈ្មួញហ៊ានធ្វើអ្វីៗតាមអំពើចិត្តគឺមានការសម្របសម្រួលពីសំណាក់លោក ឈុន សុភមង្គល ដែលជាប្រធានសាខាគយខេត្តឧត្ដរមានជ័យ ផងដែរទើបអ្វីៗអាចប្រព្រឹត្តទៅដោយរលូន។ប្រសិនបើគ្មានការសម្របសម្រួលពីសំណាក់ លោក ឈុន សុភមង្គល ទេនោះគឺឈ្មួញទាំងឡាយ មិនហ៊ានធ្វើអ្វីៗតាមអំពើចិត្តរបស់ខ្លួនដូចសព្វថ្ងៃនេះទេ។ ជាពិសេសពាក់ព័ន្ធនឹងការឃុបឃិតបើកដៃឲ្យឈ្មួញនាំចូលទំនិញគេចពន្ធ ទំនិញ បង់ពន្ធមិនគ្រប់ និងទំនិញខុសច្បាប់។ប្រភពពីមន្ត្រីគយនៅក្នុងខេត្ត ឧត្ដរមានជ័យ មួយក្តាប់តូចបានបង្ហើបឲ្យដឹងថា ក្រោយពេលប្រកាសចូលកាន់តំណែងជាប្រធានសាខាគយខេត្ត ឧត្ដរមានជ័យ រួចមកគឺ លោក ឈុន សុភមង្គល កំពុងប្រើតួនាទីនិងអំណាចប្រព្រឹត្តអំពើពុករលួយយ៉ាងគឃ្លើនដោយគ្មានញញើតច្បាប់។ប្រភពនោះបានបន្តឲ្យដឹងទៀតថា រឿងអាស្រូវពុករលួយរបស់ លោក ឈុន សុភមង្គល ត្រូវបានលាតត្រដាងជាបន្តបន្ទាប់ ប៉ុន្តែ លោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ មិនទាន់ចាត់វិធានការទប់ស្កាត់អំពើពុករលួយរបស់លោក ឈុន សុភមង្គល មេគយខេត្ត ឧត្ដរមានជ័យ នោះទេ។ទន្ទឹមនឹងនេះ លោក គុណ ញឹម ដែលជាមេគយធំ ក៏រក្សាភាពស្ងៀមស្ងាត់ទុកឲ្យលោក ឈុន សុភមង្គល ប្រធានសាខាគយខេត្ត ឧត្ដរមានជ័យ ធ្វើអ្វីៗស្រេចតែអំពើចិត្តរបស់ខ្លួន។ចំណែកមន្ត្រីនៅច្រកទ្វារអន្តរជាតិជាំ ស្រុក អន្លង់វែង ខេត្ត ឧត្ដរមានជ័យ ក៏បានឲ្យដឹងដែរថាបច្ចុប្បន្នមេគយច្រកទ្វារ អន្តរជាតិជាំ នៅតែឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និង ទំនិញខុសច្បាប់យ៉ាងសុខស្រួល។ដោយឡែកបើតាមមន្ត្រីនៅច្រកជប់គគីរ ស្រុក បន្ទាយអម្ពិល ក៏បានបង្ហើបឲ្យដឹងដែរថាមេគយប្រចាំច្រកនេះឃុបឃិតឲ្យឈ្មួញនាំចូលប្រេងសាំងគេចពន្ធ និងទំនិញគេចពន្ធយ៉ាងរលូនដោយគ្មានញញើតអ្វីឡើយ។បញ្ហានេះកំពុងធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនក្នុងមួយខែៗ ហើយផលប្រយោជន៍បានទៅលើលោក ឈុន សុភមង្គល និងបក្ខពួកដែលឃុបឃិតគ្នាប្រព្រឹត្តអំពើពុករលួយយ៉ាងពេញបន្ទុក។ប្រភពខ្លះបានឲ្យដឹងថាលោក ឈុន សុភមង្គល ហ៊ានចំណាយដើមទុនយ៉ាងច្រើនដើម្បីទទួលបានតំណែងជាមេគយខេត្តឧត្ដរមានជ័យ ទើបខំប្រឹងប្រព្រឹត្តអំពើពុករលួយដើម្បីស្រង់ដើម៕ដោយ៖ ( រំដួលដូរដី).
