ខេត្តក្រចេះ៖ ប្រជាពលរដ្ឋ ក្នុងភូមិ ក្រញូងសែនជ័យ ឃុំ ក្រញូងសែនជ័យ ស្រុក ស្នួល ខេត្តក្រចេះ បានឲ្យដឹងថា សព្វថ្ងៃសមត្ថកិច្ចពាក់ព័ន្ធ នៅតែឃុបឃិតឲ្យឈ្មួញដឹកជញ្ជូនឈើចេញទៅស្រុកយួនតាមច្រក៩៩៩៩ យ៉ាងរំភើយ។
យោងតាមប្រភពពីសមត្ថពាក់ព័ន្ធបានឲ្យដឹងទៀតថា ៖ មន្ត្រីយោធាម្នាក់ឈ្មោះ ជា វណ្ណៈមាមឋានៈមេបញ្ជាការកងអនុសេនាធំទី៣ វរសេនាតូចលេខ២០៤ នៅតែជាឈ្មួញដឹកជញ្ជូនឈើចេញទៅ ស្រុកយួនដោយគ្មានស្ថាប័នជំនាញណា ឬ សមត្ថកិច្ចពាក់ព័ន្ធចាត់វិធានការទប់ស្កាត់សោះ។ ប្រជាពលរដ្ឋក្នុងខេត្ត បានកត់សម្គាល់ថា ក្នុងការបង្ក្រាបសកម្មភាពដឹកជញ្ជូនឈើចេញទៅស្រុកយួន តាមច្រក៩៩៩៩កាលពីពេលកន្លងផុតទៅថ្មីៗមកគ្រាន់តែធ្វើឲ្យល្អមើលប៉ុណ្ណោះ ព្រោះឈ្មួញម្ចាស់ឈើនិងសមត្ថកិច្ចដែលឃុបឃិតឲ្យឈ្មួញដឹកជញ្ជូនឈើចេញទៅស្រុកយួននៅតែអាចគេចផុតពីសំណាញ់ច្បាប់ដដែល។
សកម្មជនព្រៃឈើ និង មន្ត្រីអង្គការក្រៅរដ្ឋាភិបាលក្នុងខេត្ត ក្រចេះ បានឲ្យដឹងថា ចាប់តាំងពី លោក វ៉ា ថន ទទួលបានតំណែងជាអភិបាលខេត្ត ក្រចេះ ជំនួសលោក សរ ចំរ៉ុង រួចមកគឺបទល្មើសដឹកជញ្ជូនឈើចេញទៅស្រុកយួនតាមច្រករបៀង និង ច្រកព្រំដែន ក្នុងឃុំ ក្រញូងសែនជ័យ ឃុំ ២ធ្នូ ស្រុក ស្នួល ខេត្ត ក្រចេះ ពុំមានការថយចុះឡើយ។ជាក់ស្ដែងកាលពីព្រឹកថ្ងៃទី១១ ខែ ឧសភា ឆ្នាំ ២០១៩ រថយន្តដឹកឈើមួយគ្រឿងបានបាក់ជន្ទាសដាច់កង់ទៅមុខមិនរួចនៅចំណុចស្តង់ទិញដំឡូងមី ក្នុងភូមិ ក្រញូងសែនជ័យ ហើយត្រូវបានគេដឹងថាជារថយន្តដឹកឈើរបស់លោក ជា វណ្ណៈ មេបញ្ជាការយោធាកងអនុសេនាធំលេខ៣ វរសេនាតូចលេខ២០៤ ហើយជាមនុស្សជំនិតរបស់ លោក វរសេនីយ៍ឯក មាស សុភាព ឈរជើងនៅតំបន់៨៨។ តាមការបង្ហើបពីសមត្ថកិច្ចមូលដ្ឋានតូចតាចម្នាក់បានឲ្យដឹងថា រថយន្តដឹកឈើនោះរត់ការបង់លុយរួចហើយចូលតាមច្រក០៧ ដែលលោក ជា វណ្ណៈ គ្រប់គ្រង។ប្រភពពីមន្ត្រីអាជ្ញាធរ និង សមត្ថកិច្ចមូលដ្ឋានក្នុងឃុំ ក្រញូងសែនជ័យ បានឲ្យដឹងថា បច្ចុប្បន្ន លោក ជា វណ្ណៈ គឺជាឈ្មួញល្បីខាងដឹកជញ្ជូនឈើចេញទៅស្រុកយួនតាមច្រក៩៩៩៩ ផង និង ជាអ្នកកាងក្រុមឈ្មួញដឹកជញ្ជូនឈើចេញទៅស្រុកយួនផង។ ចំណែកលោក វ៉ា ថន អភិបាលខេត្ត ក្រចេះ ក៏ដូចជាសមត្ថកិច្ចពាក់ព័ន្ធតែងរក្សាភាពស្ងៀមស្ងាត់ទុកឲ្យឈ្មួញជាមន្ត្រីយោធាឈ្មោះ ជា វណ្ណៈ ធ្វើអ្វីៗស្រេចតែអំពើចិត្តរបស់ខ្លួន។ លើសនេះទៅទៀតសូម្បីតែលោក ទ្រី សុភ័ក្ត្រ ប្រធានមន្ទីរកសិកម្មខេត្ត ក្រចេះ និង មេរដ្ឋបាលព្រៃឈើខេត្តក្រចេះ ក៏រក្សាភាពស្ងៀមស្ងាត់ដែរ ក្នុងខណៈដែលលោក ជា វណ្ណៈ នៅតែបន្តសកម្មភាពដឹកជញ្ជូនឈើនិងកាងក្រុមឈ្មួញដឹកជញ្ជូនឈើចេញទៅស្រុកយួនតាមច្រក៩៩៩៩ និងច្រកផ្សេងៗទៀតយ៉ាងសុខស្រួល។អង្ភភាពរង់ចាំការបកស្រាយគ្របើភាគីពាក់ព័ន្ធរៀងរាល់ម៉ោអធ្វើការ៕ដោយ៖( រំដូលក្រចេះ).
