មណ្ឌលគិរី៖ បង្ក្រាបបទល្មើសព្រៃឈើទ្រង់ទ្រាយធំ នៅខេត្ត មណ្ឌលគិរី នៅរសៀលថ្ងៃទី០៩ ខែ កក្កដា ឆ្នាំ ២០១៩នេះ កម្លាំងគណៈកម្មាធិការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ក្រោមការដឹកនាំបញ្ជាផ្ទាល់ពីលោក នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មាធិការជាតិដើម្បីទប់ស្កាត់ និង បង្ក្រាបបទល្មើសធនធានធម្មជាតិបានបង្ក្រាបក្នុងទ្រង់ទ្រាយធំ ដោយចាប់ខ្លួនមនុស្ស ០៤នាក់ ក្នុងនោះមានឧកញ៉ា ស៊ឹង សំអុល ប្រធានក្រុមហ៊ុន មេការ២នាក់ និងអ្នកបើករថយន្តម្នាក់ ព្រមទាំងដកហូតរថយន្ដជាង៤០គ្រឿងផងដែរ។
អ្នកនាំពាក្យគណៈកម្មការជាតិ ដើម្បីទប់ស្កាត់ និង បង្ក្រាបបទល្មើសធនធានធម្មជាតិ លោកឧត្តមសេនីយ៍ត្រី អេង ហ៊ី បានឱ្យដឹងនៅរសៀលថ្ងៃនេះថា ជាលទ្ធផលក្នុងប្រតិបត្តិការទ្រង់ទ្រាយធំនេះ កម្លាំងអាវុធហត្ថបានចាប់ខ្លួនមនុស្ស ៤នាក់ ដែលមានឧកញ៉ា ស៊ឹង សំអុល ប្រធានក្រុមហ៊ុន មេការ និងអ្នកបើករថយន្ត ព្រមទាំងរថយន្ដជាង៤០គ្រឿង។
លោក ឧត្តមសេនីយ៍ បានបញ្ជាក់ទៀតថា រថយន្ដល្មើសផ្សេងទៀត ត្រូវបានឈ្មូញយកទៅលាក់ទុកនៅក្នុងព្រៃ ហើយនៅពេលនេះកម្លាំងជំនាញ កំពុងរុករកយ៉ាងក្ដៅគគុក។លោក ឧត្តមសេនីយ៍ អេង ហ៊ី បានបញ្ជាក់ទៀតថា រថយន្ដដែលសមត្ថកិច្ចរកឃើញនៅក្នុងព្រៃ នឹង បំផ្លាញចោលនៅទីនោះតែម្ដង។ក្នុងនោះផងដែរ លោកឧត្តមសេនីយ៍ អ្នកនាំពាក្យ ក៏បានអំពាវនាវឲ្យក្រុមឈ្មួញដែលពាក់ព័ន្ធបទល្មើសព្រៃឈើនេះ ត្រូវដកខ្លួនចេញជាបន្ទាន់ បើមិនដូច្នោះទេ នឹង ត្រូវប្រឈមមុខនឹងផ្លូវច្បាប់ជាក់ជាមិនខានឡើយ។សូមបញ្ជាក់ថា ប្រតិបត្តិការដ៏ក្តៅគគុកនេះ បានកើតមានឡើងបន្ទាប់ពីគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានសម្រេចដាក់ចេញនូវវិធានការថ្មីៗបន្ថែមទៀត ដើម្បីរឹតបន្តឹងច្បាប់ឲ្យបានតឹងរ៉ឹង និងសម្រេចឲ្យមានការបំផ្លាញចោលមធ្យោបាយដឹកជញ្ជូនបទល្មើសព្រៃឈើ នៅនឹងកន្លែងតែម្តង។
លោក ឧត្តមសេនីយ៍ អេង ហ៊ី បានបញ្ជាក់ថា កន្លងទៅគណៈកម្មការជាតិ បានធ្វើការត្រួតពិនិត្យឃើញថា ទោះបីមានការផ្សព្វផ្សាយអប់រំ និង បង្ក្រាបបទល្មើសព្រៃឈើជាបន្តបន្ទាប់ក៏ដោយ នៅតែមានការលួចបន្លំកាប់ឈើ ដឹកជញ្ជូនផលអនុផលព្រៃឈើដោយខុសច្បាប់ តាមគ្រប់មធ្យោបាយគ្រប់រូបភាព។លោក បន្តថា ដើម្បីថែរក្សាបានព្រៃឈើគង់វង្ស គណៈកម្មការជាតិដើម្បីទប់ស្កាត់ និង បង្ក្រាបបទល្មើសធនធានធម្មជាតិ នឹងអនុវត្តវិធានការដូចក្រោម៖
-ទី១៖ បុគ្គល ឬក្រុមហ៊ុន ដែលពាក់ព័ន្ធការប្រព្រឹត្តល្មើសច្បាប់នេះ នឹងត្រូវអនុវត្តវិធានការច្បាប់តឹងរ៉ឹង។ទី២៖ មធ្យោបាយ (រថយន្ត គោយន្ត ម៉ូតូ…) ដែលពាក់ព័ន្ធនឹងបទល្មើសព្រៃឈើនេះ ត្រូវបានស្នើសុំទៅអាជ្ញាធរមានសមត្ថកិច្ច ដើម្បីបំផ្លាញចោលនៅនឹងកន្លែង។លោកឧត្តមសេនីយ៍ ក៏បានអំពាវនាវដល់សមត្ថកិច្ចជំនាញ អាជ្ញាធរមានសមត្ថកិច្ចគ្រប់ថ្នាក់ មេត្តារួមគ្នាគិត រួមគ្នាធ្វើ និងរួមគ្នាទទួលខុសត្រូវ និងសូមអំពាវនាវដល់ ប្រជាពលរដ្ឋទាំងអស់ ផ្លាស់ប្តូរផ្នត់គំនិត ពីការប្រកបមុខរបរកាប់ឈើ ដឹកជញ្ជូនឈើខុសច្បាប់ ទៅប្រកបមុខរបរស្របច្បាប់វិញ ដើម្បីរួមគ្នាការពារបរិស្ថាន និង ការបម្រែបម្រួលអាកាសធាតុ។
ប្រជាពលរដ្ឋ សារទរ ចំពោះ ចំណាត់ការ ដ៏ប្រពៃរបស់ គណៈកម្មាធិការ ជាតិទទួល បន្ទុក បង្រ្កាប បទល្មើសព្រៃឈើបានយ៉ាងល្អប្រសើរណាស់។ប៉ុន្តែ ប្រជាពលរដ្ឋនៅខេត្តក្រចេះ បាននិយាយថា សូមគណៈ កម្មាធិការជាតិ ទទួលបន្ទុកបង្ក្រាបបទល្មើសព្រៃ ឈើហាក់ ពុំ ទាន់មានចំណាត់ការទៅ លោក គង់ ក្រឹង ដែល ជាមេ ឈ្មួញឈើ ដ៏ល្បីល្បាញ ពេញខេត្តក្រចេះនោះ ហាក់នៅមានរាសីនៅឡើយទេ អាចថា មានរាសីខ្ពស់ជាង លោក សឹង សំអុលទៅទៀត ។បើតាមប្រភពពី ប្រជាពលរដ្ឋនៅស្រុក ស្នួល បាននិយាយតៗគ្នាតាមតុកាហ្វ ថា ៖លោក គង់ ក្រឹង អាចមានទំានក់ទំនងល្អជាមួយ ស្ថាប័នកំពូលៗ ទើបមិនខ្វល់ពី ការបង្រ្កាបរបស់ គណៈគម្មាធិការជាតិទទួលបន្ទុកបង្រ្កាបបទល្មើសព្រៃឈើ ៕ ដោយ៖ (ធញ្ច័យ).
