ភ្នំពេញៈ សម្តេច ក្រឡាហោម ស ខេង ឧបនាយករដ្ឋមន្រ្តីនឹងជារដ្ឋមន្រ្តីក្រសួងមហាផ្ទៃ តែងតែដាក់ចេញនូវបទបញ្ជាដល់អាជ្ញាធរ និង សមត្ថកិច្ចទូទាំង រាជធានី ខេត្ត /ក្រុង ត្រូវ នាំគ្នាទប់ស្កាត់ និង បង្ក្រាបរាល់បទល្មើសទាំងអស់ ជាពិសេស បនល្បែងស៊ីសង ខុសច្បាប់ឲ្យខាងតែបាន នៅក្នុងមូលដ្ឋានរបស់ខ្លួន ដើម្បីទប់ស្កាត់បទល្មើសចោរលួច ឆក់ប្លន់។ល។
បច្ចុប្បន្នគេឃើញ លោក ឆើត និង បក្ខពួក មានវាសនាខ្ពស់ជាងទីកន្លែងដ៏ទៃទៅទៀត ដែលអាចបើកសង្វៀនជល់មាន់បានយ៉ាងរលូនគ្មានសមត្ថកិច្ច ឬ អាជ្ញាធរណាហ៊ានចុះទៅក្បែរផង សូម្បីតែក្អកមួយខេះក៏មិនហ៊ានផងដែរ ដែលខុសពីកន្លែងដទៃត្រូវបានសមត្ថកិច្ច ឬ អាជ្ញាធរបង្រ្កាបយ៉ាងល្អប្រសើរ។
បើយោងតាមប្រភពពីប្រជាពលរដ្ឋរស់នៅក្បែរសង្វៀនជល់មាន់នោះបាន និយាយថា៖ បច្ចុប្បន្ន ពូកគាត់មានការភ័យខ្លាចយ៉ាងខ្លាំង ដោយហេតុយល់ថា កាលណាបើមានបនល្បែងស៊ីសងរីកដូចដួងតារារះនាពេលរាត្រីនោះ វាអាចកើតឡើងនូវ ចោរលួចឆក់ឬប្លន់ក៏ថាបាន ។ម៉្យាងទៀតនៅពេលណាឈ្នះមិនជាអ្វីទេ ។ប៉ុន្តែ បើសិនជាចាញ់វិញអាចកើតនូវអំពើហឹង្សាជាដើម។
ប្រភពនោះបានបន្តទៀតថា៖ ពួកគាត់សំណូមដល់ លោក ពេជ្រកែវ មុនី អភិបាលនៃគណៈអភិបាល ខណ្ឌមានជ័យ គួរតែមានវិធានការទៅលើសង្វៀនជល់មាន់ឲ្យទាន់ពេលវេលា ជៀសវាងការរិះគន់លោក ថា អាចមានការជាប់ពាក់ព័ន្ធឬទទួលលាភសក្ការៈពីមេបនល្បែងស៊ីសងនៅកណ្តាលក្រុងភ្នំពេញក៏ថាបានដែរ នេះជាការយល់ឃើញរបស់ប្រជាពលរដ្ឋនៅក្បែរនោះ។សូមបញ្ចាក់ថាទីតាំង សង្វៀនជល់មាន់ ស្ថិតនៅខាងត្បូង ស្ពានអាកាសស្ទឹងមានជ័យ ចម្ងាយប្រហែលជា ៥០ម៉ទៅ៦០ម៉ ស្ថិតនៅ ភូមិភ្នាត សង្កាត់ ស្ទឹងមានជ័យ០២ ខណ្ឌមានជ័យ រាជធានីភ្នំពេញ។
បើប្រភពពីអ្នកញៀនល្បែង បាននិយាយតាមតុកាហ្វេថា លោក ឆើត និង បក្ខពួក បានរត់ការ ជាមួយស្ថាប័នពាក់ព័ន្ធរួចរាល់អស់ហើយ មិនមានបុគ្គលហ៊ានទៅរញ៉េរញ៉ៃនោះទេ ហើយប្រភពនោះបានបន្តទៀតថា៖ សង្វៀនជល់មាន់ របស់ លោក ឆើត គឺលេងជាយូរយាណាស់មកហើយ ដោយគេលេង ដូរថ្ងៃលេង ( មានន័យថា គេលេងចល័តថ្ងៃ ដោយខ្លាចអ្នកាសែតថតបានយកទៅផ្សាយ)។ដូចសុភាសិតខ្មែរមួយឃ្លាបាននិយាយថា៖ ( ដំរីងាប់យកចង្អេមកបាំង) បើយើងនិយាយងាយយល់នោះ គឺដំរីធំណាស់ មិនអាចចង្អេមកបាំងជិតនោះ ពោល គឺបើកបនល្បែងស៊ីសងមានអតិថិជនមកលេង ហ៊ោកញ្ជ្រៀវពេញសង្វៀនជល់មាន់លាន់ឮពេញភូមិស្ទើរដល់សាលាក្រុងថែមទៀតផង។បទបញ្ជារបស់ប្រមុខរាជរដ្ឋាភិបាល សម្តេចតេជោ ហ៊ុន សែ ន ក៏បានបញ្ចេញប្រតិកម្មខ្លាំងៗធ្វើការព្រមាន ដល់៖ (ចៅហ្វាយខេត្ត ចៅហ្វាយក្រុង លោក ចៅ ហ្វាយខណ្ឌ លោក មេប៉ុស្តិ៍ លោក មេឃុំ លោក ចៅសង្កាត់ ដែលអសមត្ថភាព ក្នុងការងារដឹកនាំ បញ្ជាឲ្យចុះទៅហាមឃាត់និងចាត់វិធាការបង្ក្រាបរាល់បទល្មើសគ្រប់ប្រភេទដែលកើតឡើងនៅក្នុងដែនសមត្ថកិច្ចគ្រប់គ្រងរបស់ខ្លួន និង បទបញ្ជារបស់ សម្ដេចក្រឡាហោម ស ខេងប្រកាសក្តែងៗឲ្យមន្ត្រីនគរបាលសមត្ថកិច្ចគ្រប់លំដាប់ថ្នាក់យកចិត្តទុកដាក់អនុវត្តន៍លើវិធានការទប់ស្កាត់ និងបង្ក្រាបបទល្មើសល្បែងស៊ីសងគ្រប់ប្រភេទ ដោយគ្មានការលើកលែង ដើម្បីពង្រឹងគោលនយោបាយភូមិ ឃុំ/ សង្កាត់មានសុវត្ថិភាពទាំង០៩ចំណុចដែលបានដាក់ចេញ។
ពេលថ្មីៗ លោក អភិបាលរាជធានីភ្នំពេញ ប្រកាសវះកាត់មន្រ្តីណាដែលកាងពីក្រោយបទល្មើសល្បែងស៊ីសងនៅមូលដ្ឋានដើម្បីព្រមានទប់ស្កាត់កុំឲ្យបទល្មើសគ្រប់ប្រភេទនេះ នៅរាជធានីភ្នំពេញកើតឡើងតទៅទៀត ។ លោក អភិបាលរាជធានីភ្នំពេញ រូបនេះបានបន្តទៀត ថា ៖មន្រ្តីក្រោមឱវាទ និងតាមមូលដ្ឋានទាំងអស់ត្រូវបញ្ឈប់ជាបន្ទាន់ពីការទទួលសំណូករបស់ជនខិលខូចមួក្តាប់តូច ដើម្បីបើកឱកាសឲ្យមានសកម្មភាពប្រព្រឹត្តល្បែងស៊ីសងខុសច្បាប់នៅក្នុងដែនសមត្ថកិច្ចរបស់ខ្លួន បើពុំដូច្នេះទេនឹងត្រូវវះកាត់អស់បុណ្យស័ក្តិ ជាក់ជាមិនខាន។ប៉ុន្តែផ្ទុយទៅវិញ សង្វៀនជល់មាន់ របស់ លោក ឆើត និង បក្ខពួក នៅតែបើកបានយ៉ាងល្អប្រសើរ នឹងគួរឲ្យសរសើរថែមទៀតផង ។ តើ លោក អភិបាល រាជធានីភ្នំពេញ បានជ្រាបដែរឬទេ ចំពោះសង្វៀនជល់មាន់មួយនេះ ទាន…!?។
បើយោងតាមប្រភពពីអ្នកស្និទនឹងលោក ឆើត បានព្រលើយមាត់ថា ៖( លោក ឆើត មិនខ្លាចនឹងកាសែតចុះពីអីក៏ចុះទៅ សំខាន់អូនស្អាត បងមិនខ្វល់ពីចុះរបស់អ្នកកាសែតនោះឡើយ)។សង្វៀនជល់មាន់ខាងលើនេះមានបើកលេងល្បែងស៊ីដែលសកម្មភាពល្បែងស៊ីសងទាំងនេះបង្កឲ្យមានអសន្តិសុខសង្គមដូចជាឲ្យមានអំពើហឹង្សាក្នុងគ្រួសារ។ល។
ពាក់ព័ន្ធករណីខាងលើ អង្គភាពយើងព្យាយាមទាក់ទង លោក ឆើត ដើម្បីសុំការបកស្រាយគ្រប់ពេលវេលា ប៉ុន្តែ អង្គភាពយើងគ្មានលេខរបស់ លោក ឆើត ។ អង្គភាពរង់ចាំការបកស្រាយគ្រប់ភាគីពាក់ព័ន្ធរៀងរាល់ម៉ោងធ្វើការ ដោយស្របទៅតាមច្បាប់ស្តីអំពីរបបសារព័ត៌មាន នៃព្រះរាជាណាចក្រកម្ពុជា៕ដោយ៖( តាខ្មៅ).
